Nanawagan si Bohol Governor Aris Aumentado sa mga Bol-anon hilabi na sa mga nagpuyo sa mga nagkadaiyang isla sa probinsya ug coastal barangays nga tabangan ang kagamhanan sa Bohol sa pagpakigbatok sa African Swine Fever.
Matud ni Gov. Aumentado, nga kinahanglang makig-tambayayong ang mga residente aron malikayan ang pagkuyanap sa ASF pinaagi sa pagpugong ug pagdili sa mga pork meat deliveries.
Gihimug-atan sa Gobernador nga kinahanglan ang pagtinabangay sa mga Bol-anon aron malikay ug dili maapektuhan ang mga hog raisers lakip na ang sector sa agrikutura sa pagkuyanap sa ASF.
Kahinumdoman nga gipatuman sa kagamhanan sa mismong probinsya ang 60 ka adlaw nga temporaryong pagdili sa pagsulod sa mga buhing baboy, karne sa baboy, mga produkto sa baboy, ug uban pang gi-regulate nga mga produkto gikan sa Negros Occidental ug Negros Oriental aron mapalig-on ang depensa sa probinsya batok sa African Swine Fever (ASF).
Kini gipirmahan ni Gov. Aris Aumentado pinaagi sa Executive Order (EO) No. 28 niadtong Hulyo 3, 2026, human sa kumpirmadong mga kaso sa ASF sa Isla sa Negros, nga nagpalig-on sa mga lakang sa biosecurity sa utlanan sa Bohol aron mapanalipdan ang industriya sa baboy nga nag-ayo sa probinsya.
Ang EO nagmando usab sa mas estrikto nga veterinary quarantine checkpoints, gipakusog nga inspeksyon sa utlanan, ug hugot nga koordinasyon tali sa mga hingtungdang ahensya ug mga lokal nga yunit sa gobyerno aron masiguro ang pagsunod.
