Mipasidaan si Chinese Consul General Zhang Zhen ngadto sa Cebu City Council human niya gihulagway isip usa ka “dayag nga pagpanghagit” o “blatant provocation” ang resolusyon nga gipasar sa konseho nga nagdeklarar sa Hulyo 12 isip West Philippine Sea (WPS) Victory Day.
Misamot pa ang tensiyon human imbitahon sa kagamhanan sa dakbayan si Defense Secretary Gilberto Teodoro Jr. isip dinapit nga mamumulong niadtong Lunes, Hulyo 13, alang sa opisyal nga paghandum nga gipahigayon sa Cebu City Hall.
Kahinumduman nga si Teodoro ug iyang pamilya kaniadto gipahamtangan og sanksyon sa Beijing ug gideklarar isip persona non grata.
Sa usa ka press conference, gipahayag ni Zhang ang iyang kasagmuyo ug gikuwestiyon kung ang maong lakang nagpasabot ba nga gipili sa Sugbo ang pakigsumpaki imbes nga pagpalig-on sa panaghigalaay tali sa duha ka nasod.
Matod pa niya, ang maong mga lihok mahimong adunay negatibong epekto direkta man o dili direkta, hamubo man o dugay nga panahon sa relasyon tali sa Cebu ug China.
Dungan niini, nagpahigayon og diplomatic protest ang Chinese Consulate batok sa maong resolusyon.
Gipasabot ni Zhang nga wala giila sa Beijing ang 2016 arbitral ruling nga nagwagtang sa lapad nga pag-angkon sa China sa kadagatan.
Sa laing bahin, gipasabot ni Cebu City Councilor Pablo “Paul” Labra II atol sa usa ka kalihokan nga gipangulohan sa Armed Forces Visayas Command (Viscom) nga ang maong paghandum wala gihimo aron mangaway o manghagit og kagubot.//
Matod ni Labra, ang tumong sa resolusyon mao ang pagpalambo sa kalinaw, pagpataas sa kaamgohan, ug pagbarog alang sa kamatuoran pinasubay sa internasyonal nga balaod.
Una niini, gidayeg ni Defense Secretary Gilberto Teodoro Jr. ang pag-ila sa Dakbayan sa Sugbo sa kadaugan sa Pilipinas sa 2016 Arbitral Ruling, ug nagpahayag og paglaom nga sundon kini sa ubang local government units aron matubag ang mga probokasyon gikan sa Chinese officials.
