Nakatala ang usa ka 69-anyos nga lalaki sa New York og Guinness World Record human sa iyang pagdonar og 30 ka galon (113.5 ka litro) nga dugo, diin bugti kini sa 344 ka lata sa soft drinks.
Si Dan Ryan pormal nga gihatagan sa titulo nga “most whole blood donated (male)” niadtong Hunyo 24, 2025 sa Malta, New York.
Si Dan nagsugod sa pagdonar niadtong 1980 tungod sa pag-awhag sa iyang namatay nga igsoon. Tungod sa kahadlok sa mga dagom, sa sinugdanan midumili siya, apan sa katapusan nakombinsir sa iyang igsoon gumikan tawgon siya nga “talawan’
Sukad niadto, si Dan usa ka regular nga donor. Sa miaging 46 ka tuig, kausa ra siya napugos sa paghunong, sulod sa tulo ka tuig, tungod kay kinahanglan niya og tambal sa malaria. Tungod sa iyang dedikasyon, nakadawat siya og 32 ka milestone pin gikan sa American Red Cross, nga iyang gihimo pa gani nga espesyal nga kahoy nga frame. Ang frame adunay espasyo alang sa 40 ka pin tungod kay plano niya nga ipadayon ang pagdonar kutob sa iyang mahimo. Kon magpadayon siya, makaabot siyag 40 ka galon sa dili pa ang iyang ika-80 nga adlawng natawhan.
Sumala ni Dan, iyang gipahinungod kini nga dungog sa iyang igsoon kay dili unta kini mahitabo kon wala siya. Nalabwan niya ang miaging rekord nga 241 ka donasyon nga gihimo ni Paritosh Bagai sa India niadtong 2024. Nalipay usab siya nga nadasig niya ang iyang 20 anyos nga apo nga gusto na usab nga mahimong donor sa dugo.
