Gihulagway ni Atty. Rameses Villagonzalo, usa ka ICC accredited lawyer nga usa ka illegal, Immoral ug pagpanghinambog ang gipagawas nga pamahayag ni US Secretary of State Marco Rubio, maylabut sa kampanya sa Estadus Unidos nga i-dismantle ang International Criminal Court.
Gipasabot ni Atty. Villagonzalo, nga ang ICC naglangkob kini sa 125 ka mga miyembro nga nasud, nga naghugpong aron imbestigahan, kasuhan, ug husayon ang mga indibidwal nga giakusaran sa labing grabe nga mga kalapasan sa kalibutan sama sa genocide, war crimes, crimes against humanity, ug ang krimen sa agresyon.
Sigon niini nga ang pronouncement ni Sec. Rubio usa ka pagpanghilabot ug kawalay respeto sa mga nasud nga miyembro niini lakip na ang mandato og prinsipyo sa International Tribunal.
Gihimug-atan niini nga ang planong pagbuwag sa ICC naghulagway sa Estados Unidos nga ignorante sa mandato og prinsipyo sa korte, ug iyang gidugang nga usa sa mga rason sa ilang mga lakang mao ang pagpanalipod sa mga kaalyado niini sama sa Israel og pagpadakop kang Prime Minister Benjamen Netanyahu, gumikan sa mga pending nga kasong giatubang niini.
Matud ni Atty. Villagonzalo, nga possible usab nga napaglantawan sa administrasyon ni US President Donald Trump, nga mamahimo silang gukoron ug panubagon sa mga war crimes o crimes of aggression nga ilang nabuhat sa kaatbang nga mga nasud.
Samtang sa pikas bahin, gidudahan usab niini nga ang Estados Unidos nga magporma og laing susama og konsepto sa ICC apan paluyhan sa America nga adunay multiple standards.
Kahinumdoman nga mipagawas usab og pamahayag ang Presidential Communications Office maylabut sa maong isyu og mibutyag nga ang gobyerno sa Pilipinas walay kalambigitan sa mga palisiya o aksyon sa Estados Unidos, human sa lakang sa administrasyong Trump nga ipadayon ang mga lakang nga nagtumong sa pagbungkag sa International Criminal Court (ICC).
