Nagpadayon ang mga proyekto sa pagpalambo sa drainage system sa Mandaue City aron maminusan ang pagbaha sa mga flood-prone nga lugar.
Sumala ni Mandaue City Mayor Thadeo “Jonkie” Ouano, 91 porsyento na ang nahuman sa drainage improvement project sa A.S. Fortuna Street sa Barangay Banilad, samtang 55 porsyento na ang nahuman sa proyekto sa Lopez Jaena Street sa Barangay Tipolo.
Bisan pa sa kusog nga ulan nga hinungdan sa pagbaha sa maong mga lugar, matud ni Ouano nga mas paspas na karon ang paghubas sa tubig kumpara kaniadto.
Gipasabot sa mayor nga dili tumong sa proyekto ang hingpit nga pagsulbad sa pagbaha, kondili ang pagpaspas sa pag-agas sa tubig aron dili na kini magdugay.
Dugang pa niya, nagpadayon usab ang laing drainage project sa Barangay Subangdaku, samtang gipadayon usab sa siyudad ang regular nga declogging sa mga kanal isip kabahin sa flood mitigation program.
