Nangulo si President Ferdinand R. Marcos Jr. sa usa ka gala dinner sa Malacañang isip pagsaulog sa ika-50 nga anibersaryo sa Treaty of Amity and Cooperation in Southeast Asia (TAC).
Isip 2026 Chair sa ASEAN, ang Pilipinas nangulo sa pagsaulog sa kasabutan nga nagpasiugda sa kalinaw, kooperasyon, ug pagrespeto sa usag usa sukad niadtong 1976.
Sa maong adlaw, miapil sa kasabutan ang Sweden, Poland, Romania, ug Lithuania, nga nagdala sa kinatibuk-ang gidaghanon sa mga miyembrong nasud ngadto sa 62.
Sa iyang pakigpulong, gitandi ni Presidente Marcos ang diplomasya sa tradisyon sa mga Pilipino sa lamesa sa kan-anan, diin ang mga tawo magtigom aron mag-istoryahanay ug magsinabtanay.
Matod niya, sama sa mga pamilya nga magtapok sa lamesa, ang mga lider makab-ot ang kalinaw pinaagi sa diyalogo ug kooperasyon.
Gisubli usab sa Presidente ang kasaysayan sa TAC ug gihisgutan nga ang iyang amahan, si kanhi Presidente Ferdinand E. Marcos, usa sa mga mipirma sa kasabutan niadtong 1976.
Isip kabahin sa selebrasyon, gilunsad sa Pilipinas ang commemorative postage stamp ug usa ka logo nga inspirado sa sampaguita isip simbolo sa 50 ka tuig nga kalinaw.
Gitapos ni President Marcos ang iyang mensahe pinaagi sa pag-awhag sa mga lider nga ipadayon ang mga mithi sa TAC pinaagi sa pagsalig, diyalogo, ug panaghiusa.
