Gihimakak ni Vice President Sara Duterte ang mga espekulasyon nga mo-resign siya sa iyang pwesto taliwala sa nagpadayon nga impeachment trial batok kaniya.
Sa usa ka mubo nga interbyu nga gipaambit sa usa ka online page, giinsistir sa bise presidente nga dili siya mo-resign.
Matod niya, ang pagbuhat niini mahimong pagbudhi sa 32.2 milyon ka mga Pilipino nga mibotar kaniya.
Dugang pa niya nga kung gusto ni President Ferdinand “Bongbong” Marcos Jr. nga mapahawa siya sa pwesto, mahimo niya ang tanan aron mapalagpot siya sa pwesto.
Samtang, si VP Sara anaa karon sa Europa isip kabahin sa iyang mga biyahe sa gawas sa nasud, lakip ang pakigkita sa mga komunidad sa overseas Filipino workers (OFWs).
Niadtong Sabado, mitambong siya sa usa ka panagtapok sa London, diin sa iyang pakigpulong gibasol niya ang giingong pagdaghan sa mga “buaya” sa gobyerno.
Gikritika usab niya ang administrasyon tungod sa giingong kapakyasan sa paghatag og igo nga mga oportunidad sa mga Pilipino, nga maoy hinungdan nga daghan ang napugos sa pagpangitag trabaho sa gawas sa nasud.
Niadtong miaging semana, mibisita usab si VP Sara sa The Hague, Netherlands, diin kasamtangang gibilanggo ang iyang amahan, si kanhing Presidente Rodrigo Duterte.
