CEBU CITY- Nadakpan sa mga sakop sa Carbon Police Station pasado alas 12:30 sa kaadlawon niadtong Hulyo 29, 2026, sa Barangay Poblacion Pardo, Cebu City, ang suspek sa pagpamusil sulod sa Carbon Public Market Unit 3 niadtong Lunes sa hapon.
Giila ang suspek nga si Robert Pogoy, 30 anyos, usa ka manghimoay og tarima ug residente sa maong lugar.
Siya ang gitumbok nga mipusil ug nakapatay kang Virgil Paglinawan Marson, 30 anyos, taga-Tisa, Cebu City.
Nadakpan si Pogoy pinaagi sa hot pursuit operation sa Drug Enforcement Unit ug Tracker Team sa Carbon Police Station.
Nakuha gikan kaniya ang gituohang armas nga gigamit sa krimen, usa ka .38 revolver nga walay serial number, duha ka buhing bala, ug usa ka kabhang sa bala.
Sa pakighinabi sa Bombo Radyo Cebu News Team, miangkon si Pogoy sa krimen ug miingon nga iyang gibuhat kini isip pagdepensa sa kaugalingon.
Matod niya, may una nang insidente diin giingong misulay og pagpamusil si Marson kaniya pipila ka bulan ang milabay.
Giingon ni Pogoy nga nagkita sila pag-usab ni Marson sulod sa Carbon Public Market niadtong Hulyo 27, diin iyang giunhan og pusil ang biktima human siya nakabantay nga posibleng pusilon siya pag-usab.
Gipahayag ni Pogoy ang iyang pagbasol sa nahitabong insidente. Karon, anaa siya sa custodial detention facility sa Carbon Police Station ug gikatakdang atubangon ang kasong murder. | With Reports of Bombo Rexmond Onega
