Nagkakusog ang ebidensya sa kaso sa impeachment batok kang Bise Presidente Sara Duterte human gisumite ang iyang mga rekord sa bangko ug buhis sa korte sa impeachment sa Senado. Gilauman usab nga mosunod ang report sa Anti-Money Laundering Council (AMLC).
Kini gipasiugda ni House prosecutor ug Bicol Saro Party-list Rep. Terry Ridon.
Sumala ni Ridon, ang katuyoan sa mga dokumento mao ang pagpamatuod sa alegasyon sa wala matino nga bahandi ug giingong sayop nga paggamit sa confidential funds.
Dugang niini nga ang prosekusyon sunod nga mag-focus sa paagi sa paggasto sa maong mga pundo.
Gikutlo usab niya ang testimonya sa duha ka kanhing LandBank branch managers nga miingon nga ang pag-encash sa P612.5 milyon nga confidential funds dili kasagaran.
Samtang, ang mga saksi gikan sa Commission on Audit (COA), National Bureau of Investigation (NBI), ug Philippine Statistics Authority (PSA) gilauman nga mopasabot kalabot sa mga disallowances ug kuwestiyonableng liquidation sa confidential funds.
