Mamahimo na nga P12 matag litro ang diskwento sa mga driver sa jeepney ug UV Express sugod Agosto 15, subay sa mando ni Presidente Ferdinand Marcos Jr. nga dugangan ang diskwento sa petrolyo alang sa sektor sa transportasyon.
Matud ni Executive Secretary Ralph Recto nga kung mapatuman na, ang mga drayber makabenepisyo hangtod sa P1,800 kada semana.
Kini dugang sa inisyal nga P10 kada litro nga diskwento nga nagsugod niadtong Abril, nga nakabenepisyo na sa kapin 93,000 ka mga driver sa PUV.
Kini nahukman atol sa usa ka miting nga gipangulohan ni Executive Secretary Recto, uban sa mga kalihim sa gabinete, niadtong Agosto 4 sa Malacañan.
Gihisgutan sa miting ang padayon nga pagpalig-on sa mga lakang sa gobyerno aron mapanalipdan ang ekonomiya, mapugngan ang pagtaas sa presyo, ug masiguro ang suporta para sa mga sektor nga direktang naapektuhan sa tensyon sa Middle East.
Dugang pa, gimandoan ni ES Recto ang DSWD nga sigurohon nga ang tabang sa UPLIFT makaabot sa mga nanginahanglan nga sektor, lakip ang mga mag-uuma, mangingisda, mga trabahante sa transportasyon ug konstruksyon, ug uban pang mga trabahante nga ubos ang kita.
Una nga gihatagan og gibug-aton ni Presidente Marcos ang pasalig sa gobyerno sa pagsuporta niadtong labing naapektuhan sa mga hagit sa ekonomiya sa kalibutan.
