Gilauman nga mas mohugot pa ang mga reserba sa kuryente sa Visayas ning ikatulong semana sa Agosto, sumala sa datos gikan sa National Grid Corp. of the Philippines (NGCP).
Diin tali sa Agosto 17 ug Agosto 21, ang grid sa Visayas mag-atubang og mas gamay nga operating margins kon itandi sa gibanabana sa pagsugod sa bulan.
Ang mga margin gilauman nga moubos ngadto sa 120 megawatts (MW) sa sayong bahin sa semana. Apan, ang mga margin niabot og sobra sa 230 MW niadtong Agosto 3 hangtod 7.
Ingon man nga ang operating margin nagsilbing buffer sa magamit nga kuryente nga nahabilin human matubag ang gibanabana nga peak demand.
Alang sa Agosto 17 hangtod 21, ang mga grid projection nagpakita og operating margin nga 122 MW sa Lunes, 120 MW sa Martes, 128 MW sa Miyerkules, 133 MW sa Huwebes, ug 226 MW sa Biyernes.
Samtang, ang average nga operating margin sulod sa lima ka adlaw kay anaa sa 146 MW, 37 porsyento nga mas ubos kon itandi sa 233-MW nga average nga giplano alang sa Agosto 3 hangtod 7.
Subay niini, nanawagan si Gov’t relations and regional affairs lead NGCP, Cebu-Bohol Area Michael Ortega Ligalig sa publiko nga magkahiusa ug himuong kabahin sa lifestyle ang pagdaginot sa paggamit sa kuryente.
Ingon man nihangyo ang ahensya nga magmapailubon ang publiko sa kasamtangang panahon, labi na kon karon nga adunay kakulang sa suplay sa kuryente.
