Nagmando ang Philippine National Police (PNP) sa pagtangtang sa mga video ug litrato nga may kalabotan sa bayolenteng pagpamusil sa Ateneo de Zamboanga University junior high school campus niadtong Martes, Agosto 18, nga nakapatay sa duha ka estudyante lakip na ang shooter ug nakaangol sa unom ka indibidwal.
Diin sa mando ni PNP chief PGen. Jose Melencio Nartatez Jr. , makig-alayon kini sa Anti-Cybercrime Group, sa mga social media platform aron tangtangon ang mga video ug litrato nga may kalabotan sa insidente.
Gipasabot sa hepe sa PNP nga gusto sa mga awtoridad nga mapugngan ang dugang nga pagkaylap sa mga sensitibo nga materyales pinaagi sa pag-repost ug pagpaambit, labi na sa mga menor de edad.
Sa usa ka pahayag, ang heneral miingon nga kini usa ka “dili maayo nga insidente” nga kinahanglan nga trataron uban ang labing pag-amping, labi na kay ang mga menor de edad nalambigit sa giingon nga sulud. Nanawagan usab ang hepe sa PNP sa publiko nga magmaluluy-on sa trahedya nga nahitabo pinaagi sa pagpakita og respeto ug pagka-responsable nga mga netizens o mga tiggamit sa social media.
Nanawagan usab ang hepe sa PNP nga hunongon na ang pagpaambit o pag-repost sa mga video ug litrato, nga nagpasidaan nga kini mahimong moresulta sa dugang nga kaguol sa mga biktima ug sa ilang mga pamilya ingon man sa publiko ug posible nga makaapekto sa nagpadayon nga imbestigasyon.
Samtang, ang PNP-ACG ug uban pang mga hingtungdang yunit gitahasan sa pagmonitor ug pagreport sa pagkaylap sa sensitibo nga sulud online.
