Giahangyo ni ACT Teachers Party-list Representative Antonio Tinio si Presidential Communications Office (PCO) Undersecretary ug Palace Press Officer Claire Castro nga mangayo og pasaylo bahin sa iyang pamahayag nga nagkonektar sa papel sa mga magtutudlo sa paggiya sa mga estudyante.
Gibuhat ni Tinio ang maong panawagan human sa nahitabong shooting incident sa Ateneo de Zamboanga University (AdZU) niadtong Martes, Agosto 18.
Sumala ni Tinio, dili madawat nga basulon ang mga magtutudlo sa insidente sa eskwelahan. Gipahayag sa magbabalaod nga ang mga magtutudlo dili angay himuong “scapegoats” ug hinoon, angay nga tan-awon sa gobyerno ang ubang aspeto sa problema sama sa dili igo nga pondo para sa mga eskwelahan, kakulang sa access sa mga serbisyo sa mental health, ug ang isyu sa gun control.
Sa laing bahin, dali nga giklaro ni Usec. Castro nga wala niya gibasol ang mga magtutudlo sa pagpamusil. Matod niya nga ang iyang gisulti usa lamang ka pahinumdom sa importanteng papel sa mga magtutudlo sa paghulma sa maayong pamatasan sa mga batan-on.
Dugang ni Castro nga ang iyang inahan usa ka kanhing magtutudlo, busa wala gyud niya mahunahuna nga pakamenoson ang propesyon.
