Giawhag ni President Ferdinand “Bongbong” Marcos Jr. ang mga Pilipino nga magkuha og leksyon gikan sa kasaysayan ug magpabiling komitado sa pagpanalipod sa demokrasya, kagawasan, ug nasudnong panaghiusa atol sa Adlaw ni Ninoy Aquino Jr. karung adlawa Biyernes.
Matud ni Marcos, ang kabilin ni kanhi Senador Benigno “Ninoy” Aquino Jr. nagpahinumdom sa mga Pilipino sa pagbarog alang sa ilang mga gituohan ug pag-apil sa demokratikong panaw sa nasud.
Gihisgutan usab sa presidente ang mga hagit sama sa disinformation, pagkabahinbahin, kawalay pagsalig, ug kakulang sa civic responsibility.
Gipasalig niya nga magpabiling determinado ang iyang administrasyon sa pagpanalipod sa soberanya, lagda sa balaod, ug kagawasan sa katawhan.
Si Ninoy Aquino, usa sa mga kritiko ni kanhing Presidente Ferdinand Marcos Sr., gipatay sa Manila International Airport niadtong Agosto 21, 1983.
Gideklarar sa Malacañang ang Agosto 21, 2026 isip espesyal nga adlaw nga walay trabaho isip paghandum sa iyang kabilin.
