Gipasakaan og kasong kriminal ug administratiba si Cebu City Mayor Nestor Archival, Sr. ni Ed Karlon Rama ngadto sa Office of the Ombudsman niadtong Agosto 19, 2026 kini kalambigitan sa pagdumala sa mayor sa kontrobersiyal nga Monterrazas de Cebu nga usa ka real estate development ubos sa Mont Property Group Inc.
Kini gumikan kay giingong adunay rehistradong 713 square meter nga luna nga gipanag-iya si Archival diha sulod sa Monterrazas Subdivision ubos sa transfer certificate of title nga nakuha niadtong Oktubre 2022.
Giingong wala motubag si Archival sa mga panawagan gikan sa mga residente lakip kang Bise Mayor Tomas Osmeña ug sa pipila ka miyembro sa konseho nga moluwat og cease-and-desist order (CDO) batok sa proyekto human sa grabeng pagbaha sa ubos nga mga lugar sukad pa sa bagyong Tino niadtong Nobiyembre 3, 2025.
Matud ni Ed Rama, ang mismong reklamante, misang-at siya og reklamo sa buhatan sa Ombudsman aron pagpangita og tubag ngadto sa labaw nga opisyal mahitungod nga isyu ug kung nganung dili kini mo tubag sa mga panawagan sa mga Sugboanon.
Gikataho nga ang Department of Environment and Natural Resources (DENR) nisang-at kini og kaso batok sa The Mont Property Group, Inc. niadtong Disyembre 3, 2025 tungod sa giingong paglapas sa Revised Forestry Code.
Gikutlo usab ang mga regulatory findings nga nakalapas kini sa Presidential Decree No. 1586 kun “Philippine Environmental Impact Statement System, Philippine Clean Water Act of 2004” tungod kay wala kini discharge permit.
Ang proyekto giingong nakahimo kini og 10 ka kalapas subay sa 33 ka kondisyon sa Environmental Compliance Certificate (ECC) diin 11 na lang ka kahoy ang nahibilin gikan sa 700 nga nagbarog niadtong 2022 bisan pa og adunay permit sa pagpamutol og kahoy ang developer.
Gitumbok sa reklamo nga si Archival giingong nipadayon sa iyang posisyon niadtong Hunyo 2026 nga walay legal nga basehan ang siyudad sa pagpagawas og CDO ug ang pagpatuman sa environmental regulations ubos kini sa DENR.
Gihimug-atan ni Rama, nga ang iyang pagpasaka og kaso dili mahitungod sa pamolitika, apan amg pagpangita og tubag sa mga kuwestiyonableng lakang sa Mayor, ug siya midugang nga kung mipagawas lang siya ug Ceast and desist order ug nasulbad ang baha sa siyudad, walay rason nga iya kining ipadayon.
