Mohimo og kasaysayan ang Broadway ug international theater icon nga si Lea Salonga isip unang Pilipina nga makadawat og star sa Hollywood Walk of Fame.
Pasidunggan si Lea pinaagi sa iyang ika-2,855 nga star sa seremonyas sa Septyembre 4 sa Hollywood Boulevard, atubangan sa The Pantages Theatre.
Ang seremonyas pagadumalaon ni Emmy Award-winning journalist Sibley Scoles, samtang si Ming-Na Wen ang guest speaker.
Dugay nang nagkaila sila Lea ug Wen pinaagi sa Disney’s Mulan, diin si Lea ang singing voice ni Mulan ug si Wen ang speaking voice sa karakter.
Sumala sa Hollywood Chamber of Commerce, giila si Lea isip usa ka trailblazer nga nakahatag og inspirasyon sa tibuok kalibutan pinaagi sa iyang talento ug dekada nga karera sa teatro.
Gawas sa Hollywood Walk of Fame, pasidunggan usab siya pinaagi sa Icon Award sa Manila International Film Festival Closing Night Awards Gala sa Septyembre 6 sa Beverly Hills, California.
Nailhan si Lea sa iyang Tony Award-winning nga paghulagway kang Kim sa Miss Saigon, ug nakadawat usab og Olivier, Drama Desk, Outer Critics Circle, ug Theatre World Awards. Nakapakita usab siya sa Broadway productions sama sa Les Misérables, Allegiance, ug Here Lies Love.
Usa kini ka dakong milestone sa iyang karera ug usa ka makasaysayanong higayon alang sa Pilipinas sa Hollywood.
