Mibwelta ang Chinese Embassy kang Defense Secretary Gilbert Teodoro Jr. human iyang giakusahan ang embahada nga daw naglihok isip public relations firm alang sa Chinese businessman na si Tony Yang, nga giingong nalambigit sa Sanjia Steel Corp. sa Misamis Oriental.
Gitawag sa Chinese Embassy nga “squid tactics” o “taktika sa pusit” ang mga pahayag ni Teodoro.
Sumala sa tigpamaba nga si Ji Lingpeng, imbes nga tubagon ang mga isyu nga gipatungha sa embahada, naghimo si Teodoro og “walay basehan ug sensasyonal nga mga alegasyon.”
Gipahinumdoman usab sa embahada si Teodoro nga tahuron ang rule of law ug ang desisyon sa Department of Justice nga nagbasura sa mga kaso batok sa mga Chinese worker sa Sanjia Steel Corp.
Apan giinsistir ni Teodoro nga ang embahada daw “naglihok isip usa ka abogado” ni Yang, dugang pa sa iyang pag-angkon nga nagsilbi kini isip iyang PR.
Gihagit sa Chinese Embassy si Teodoro nga magpakita og ebidensya sa iyang mga pasangil, samtang gipasiugda niini nga bahin sa ilang katungdanan ang pagsiguro nga ang mga katawhan sa China dili maakusahan o masilotan nga walay igong basehan.
