Miubos sa record-low nga 9.7 porsyento ang poverty rate sa Pilipinas niadtong 2025, sumala sa pinakabag-ong datos sa Philippine Statistics Authority (PSA).
Anaa kini sa gibanabanang 6.5 milyon ka Pilipino nga nakalingkawas sa kakabos tali sa 2023 ug 2025.
Matod sa Department of Economy, Planning, and Development (DEPDev), naabot sa nasud ang single-digit poverty target nga gilatid sa Philippine Development Plan, mas sayo kaysa gieskedyul.
Gipasiugda sa ahensya nga ang mga targeted interventions ug mga programa alang sa pagpakunhod sa income inequality nakatabang sa maong kalampusan.
Sumala sa PSA, misaka usab og 22 porsyento ang nominal income sa mga income group gikan 2023 hangtod 2025, samtang nagpabilin sa lima ka porsyento ang cumulative inflation sulod sa maong panahon.
Samtang, gipasidaan sa World Bank nga importante ang pagpadayon sa lig-on nga performance sa ekonomiya pinaagi sa pagmugna og dekalidad nga trabaho, inklusibong economic growth ug mas lig-on nga social protection.
Lakip sa mga rekomendasyon niini ang pagpalig-on sa mga programa sama sa Pantawid Pamilyang Pilipino Program (4Ps) aron mapadayon ang pagpanalipod sa mga kabus ug vulnerable nga pamilya.
