CEBU CITY- Gituohang gigamit sa pipila ka online gaming platforms ang pag-target ug pagmanipula sa mga vulnerable nga kabataan pinaagi sa cyber grooming, matod sa cybersecurity expert nga si Angel Redoble.
Matod ni Redoble, mahimong magsilbing “discovery platform” ang pipila ka online gaming platforms alang sa mga threat actors aron mailhan ug mapili ang ilang mga target.
Gipasiugda niya nga sa pag-imbestiga sa mga insidente sa school violence, angay susihon dili lamang ang tradisyonal nga aspeto sa krimen, kondili apil usab ang posibleng online grooming, coercion ug radicalization.
Kini human sa Agosto 18 nga school shooting sa Ateneo de Zamboanga University diin usa ka estudyante ang giingong namusil sa iyang kauban sa eskwelahan ug dayon nagkutlo sa iyahang kinabuhi.
Padayon nga gisusi sa mga awtoridad ang online activity ug gaming history sa suspek aron matino ang posibleng motibo ug impluwensya sa insidente, lakip ang posibilidad nga adunay online groomer nga nakaimpluwensya kaniya.
Gipasabot ni Redoble nga kasagarang magsugod ang cyber grooming sa pakighigala aron makuha ang pagsalig sa menor de edad.
Sa ulahi, mahimong gamiton ang personal ug sensitibong impormasyon alang sa blackmail o coercion.
Matod pa niya, kinahanglan apil sa imbestigasyon ang digital trail, online interactions ug grooming patterns aron matino ang posibleng mga tawo o grupo nga nakaimpluwensya sa mga suspek.
Padayon usab ang panawagan alang sa mas lig-on nga digital safety education alang sa mga ginikanan, kabataan ug komunidad.
