Giklaro sa US Embassy sa Pilipinas ang presensya sa mga Amerikano ug Pilipinong sundalo atol sa operasyon sa Sanjia Steel Corporation sa Tagoloan, Misamis Oriental, nga miresulta sa pagkadakop sa 69 ka Chinese nationals ug usa ka Pilipino niadtong Mayo 15.
Sa usa ka pahayag, giingon sa embahada nga ang pagbisita kabahin sa “routine planning efforts” alang sa umaabot nga 2027 Balikatan military exercises.
Matod sa embahada, ang US military ug Armed Forces of the Philippines personnel miadto sa pasilidad, uban sa koordinasyon sa PHIVIDEC Industrial Authority, aron susihon kung ang lugar mahimong gamiton sa maong exercises.
Sa dihang gipahibalo sila sa mga kinahanglanon sa pag-access, miadto ang grupo sa laing lugar ug wala pugsa ang pagsulod.
Ang operasyon sa Sanjia gipangulohan sa Presidential Anti-Organized Crime Commission (PAOCC) subay sa search warrant sa korte tungod sa giingong mga paglapas sa immigration, labor, ug public safety laws.
Nakaplagan usab sa pasilidad ang mga potensyal nga delikado ug radioactive nga materyales.
Gipasiugda sa US Embassy nga ang pagbisita nagpakita usab sa ilang lig-on nga pasalig sa alyansa tali sa Estados Unidos ug Pilipinas.
