Gikuwestiyon sa prosekusyon ang managlahing pagpasabot sa Office of the Vice President (OVP) sa paggamit ni Bise Presidente Sara Duterte og confidential funds.
Atol sa impeachment trial, gipunting ni Atty. Mae Divinagracia nga managlahi ang mga rason nga giingon sa mga dokumento sa OVP—lakip na ang Good Governance Program, socio-economic delivery program, ug surveillance activities.
Giangkon ni OVP Assistant Secretary Lemuel Ortonio nga adunay upat ka managlahing pagpasabot sa samang confidential funds.
Busa, si Divinagracia miingon nga kon ang mga rason padayon nga mag-usab-usab, mahimo nga siya namakak o mahimo lang kini nga usa ka “scam.”
Gisupak sa depensa ang paggamit sa mga pulong nga “scam” ug “lying,” ug gipaboran kini ni Senate Impeachment Court Presiding Officer Francis “Chiz” Escudero.
Gikumpirmar usab ni Ortonio nga nahibal-an ug giaprobahan ni Duterte ang mga lakang bahin sa confidential funds, gikan sa hangyo sa DBM, pagpagawas og disbursement, hangtod sa liquidation ug pagtubag sa mga resulta sa audit.
Samtang, gipahinumdoman ni Escudero ang duha ka habig nga mag-amping sa paggamit og mga pulong nga mahimong adunay epekto gawas sa korte.
