Gisaway ni Cebu City Vice Mayor Tomas Osmeña si Cebu City Mayor Nestor Archival sa giingong paglapas mismo niini sa BanTal Dicipline Zone ug giila pa niya kining “biggest violator.”
Sumala ni Osmeña, ang pagpatuman sa traffic discipline gikinahanglan masugdan ug mapakita nga ang city government usa sa mga estriktong nituman ug nisunod niini.
“How can they discipline the public when the biggest violator is Mayor Nestor himself?” matod ni Osmeña.
Sumala ni Osmeña, counterproductive ug usik sa oras ang pagpahamtang ug pagpatuman sa disiplina sa publiko kung ang mga lider mismo sa siyudad wala magpakita og maayong ehemplo.
“If we want to instill discipline, the example should be set from above…“This is insulting to the public, and then we tell the public we have to apply discipline pero naa’y pili-pili.” dugang niya.
Gipunting sa bise mayor nga si Mayor Archival ug uban pang mga opisyal, lakip ang mga ambassador ug VIP, naggamit og mga motorcycle escort aron lang makalusot ug makalikay sa grabeng trapiko sa siyudad.
Dugang pa ni Osmeña nga usa ka insulto sa publiko ang balik-balik nga pagpangayo og disiplina gikan sa ordinaryong mga lungsuranon samtang ang mga lider mismo mao ang nag-unang mga malapason sa balaod.
Matod pa ni Osmeña nga ang kaayohan sa mga Sugbuanon angay hatagan og prayoridad kaysa sa personal nga kalipay o interes sa mayor ug pipila ka mga napiling opisyal.
“What’s important is what’s good for the people of Cebu, not what’s good for the mayor. ”
Ang maong pamahayag sa bise mayor nitumaw atol sa Executive Session sa17th Sangguniang Panlungsod gahapong adlawa, sa dihang ang konseho naghisgut sa implementasyon sa Bantal Discipline Zone ubos sa pagdumala sa Cebu City Transportation Office (CCTO).
