Gisugyot ni Lapu-Lapu City Mayor Cindi Chan ang pag-apod-apod og transparent nga mga school bag ngadto sa mga estudyante sa mga pampublikong eskwelahan sa siyudad sa sunod nga school year aron makatabang sa pagpadali sa mga security check sa mga entrance sa eskwelahan.
Sa gipaambit ni Chan sa iyahang post, nagkanayon kini nga ang gisugyot nga transparent bag mopuli sa royal blue school bag nga kaniadto giapod-apod ubos sa libreng school supplies program sa siyudad.
Diin gidugang niya nga ang tanang 105,000 ka mga estudyante nakadawat og libreng school supplies karong tuiga, usa ka programa nga iyang giplano nga ipadayon sa sunod tuig.
Gipasabot ni Chan nga ang gisugyot nga transparent bag magtugot sa mga security personnel nga mas dali nga makasusi sa mga gidili nga butang.
Gipaambit usab sa mayor ang usa ka AI-generated nga imahe nga nagpakita kung unsa ang hitsura sa gisugyot nga transparent nga school bag, ug gitino nga ang sugyot kabahin sa mga paningkamot sa siyudad sa pagpalig-on sa seguridad ug pagsiguro sa kaluwasan sa mga estudyante ug magtutudlo sa mga pampublikong eskwelahan.
