Misaka na ngadto sa labing menos 392 ang ihap sa mga namatay tungod sa grabeng pagbaha ug pagdahili sa yuta sa Nepal ug rehiyon sa Tibet sa China, samtang kapin 1,400 ang gikataho nga missing.
Sumala sa mga awtoridad, labing menos 389 ka tawo ang namatay sa Nepal ug tulo sa Tibet.
Gatusan ka lokal nga residente ug mga langyaw nga turista gikan sa India, Estados Unidos, United Kingdom, Canada, Australia, ug China ang gikataho nga missing.
Nahimo nga dakong hagit alang sa mga otoridad ang mga operasyon sa pagpangita ug pagluwas tungod sa pagkadaot sa mga dalan ug tulay sa kabukiran.
Migamit og mga helikopter ang mga rescue team sa paghatod og pagkaon, tambal, ug mga tolda, ingon man sa pagbakwit sa mga nasamdan nga biktima.
Matud sa mga siyentista, gipahinabo ang trahedya sa pag-collapse sa dakong bahin sa glacier ug mga bato sa Lhende River, nga misangpot sa kalit nga pagbaha sa mga lungsod ug walog.
Ang United Nations ug nagkalain-laing mga nasud nakahatag na og minilyon ka dolyar nga emergency ug inisyal nga tabang alang sa mga komunidad nga naapektuhan sa kalamidad.
