Gi-awhag sa Department of Health ang mga ginikanan nga padayon nga saligan ang siyensya ug medical evidence tungod sa kabalaka nga mitumaw human sa giingung pagkamatay sa usa ka batang nabakunahan batok sa meseales-rubella vaccine sa Dumanjug, Cebu.
Gipadayag ni Dr. Vam Phillip Baton, ang Chief and Local Health Support Division sa DOH-7 nga nasabtan niini ang kabalaka sa mga ginikanan kalabot sa maong insidente ug nakigduyog kini sa kasubo sa pamilya sa namatay nga bata, apan sumala sa ahensya, wala pa’y medical evidence nga konektado ang kamatayon sa maong kaso ngadto sa MR vaccine.
Matud niini, padayon ang usa ka rigorous ug transparent medical investigation aron masusi ang insidente ug gipasiugda usab sa buhatan nga ang maong MR vaccines dugay nang gigamit sa Pilipinas ug nakahatag na og proteksyon sa milyon-milyong Filipino nga mga bata sulod sa daghang katuigan.
Samtang, gipahinumdoman sa ahensya ang publiko nga ang mas dakong hulga anaa mismo sa tigdas ug rubella.
Hinungdan nga gihimug-atan sa ni Dr. Baton nga ang pagbakuna nagpabiling usa sa labing importanteng depensa batok sa maong mga sakit lakip na ang pagkompleto sa gi-rekomendang vaccination doses tungod kay dili tanang bata makapalambo dayon og igo nga immunity human sa unang dose.
Kon dili makompleto ang gikinahanglang pagbakuna, mahimong kulang ang proteksyon sa bata batok sa measles ug rubella ug mas mahimong vulnerable kini kon mataptan sa virus.
Mipasidaan usab si Dr. Baton nga kon mokunhod ang vaccination rates, mahimong motaas ang posibilidad sa measles outbreak nga mahimong makaapekto sa daghang mga bata sa komunidad.
Samtang nagpadayon ang medical investigation sa Dumanjug case, giawhag sa DOH ang mga ginikanan nga dili mag-base sa kahadlok kung wala pa mapamatud-ang impormasyon.
