Moabut sa 50- ka mga partisipante ang gilauman nga mosalmot sa “Halad sa Pagtou” nga ipahigayon karong adlawa, Sabado, Agusto 29, 2026, nga gipangulohan usab sa kagamhanan sa Probinsya sa Sugbo.
Matud sa ni Ainjeliz Dela Torre-Orong, ang Provincial Information Officer sa Kapitolyo, sa iyang pagpakighinabi sa Bombo Radyo Cebu, nga ang mismong kalihokan, namugna kaniadto pang nakalabay nga tuig 2025, diin tumong niini nga mapasigarbo pinaagi sa parada sa mga karosa, ang mga nagkadaiyang patron gikan sa nagkalain-laing munisipalidad.
Lauman nga mopasundayag ang 7-ka mga contingents sa mga nagkadaiyang munisipalidad nga kanhi partisipante sa Sinulog ug 50-ka mga karosa ang moparada karong adlawa.
Sigon ni Orong, nga moabut ra sa P20 Million ang gibana-bana nga gigasto sa kagamhanan sa Probinsya sa kinatibuk-an na nga gasto kung ikumpara sa nakalabay nga “Pasigarbo sa Sugbo” nga matud pa moabut sa P200 Million.
Gipahibalo usab niini nga libre ra ang mga tickets alang sa kalihokan nga gipanghatag sa buhatan sa Provincial Tourism Office, apan giklaro ni Orong, nga limitado lang kini aron sa pagkontrolar sa gidaghanon ug alang sa kaluwasan sa siguridad.
Magsugod ang parada sa mga karosa gikan sa Kapitolyo, alas 3 sa hapon, padulong sa Cebu City Sports Center, samtang magpahigayon ug misa alas 5 sa hapon ug mosunod ang mga pasundayag sa mga contingents.
Lauman nga mahuman ang “Halad sa Pagtuo” pasado alas 7 na sa gabie.
