Maghimo ang Department of the Interior and Local Government (DILG) ug ang Philippine National Police (PNP) og Quick Reaction Forces sa tanang rehiyon ug dakbayan sa nasod aron paspas nga makaresponde sa mga hulga sa siguridad sa mga tunghaan.
Sumala ni Interior Secretary Jonvic Remulla, ang maong lakang gihimo human makadawat og security threats ang pipila ka tunghaan, diin duha ka pribadong eskwelahan sa Metro Manila ang gani nag-kanselar sa ilang face-to-face classes.
Samtang giandam pa ang maong sistema, gihimong mandatory ang pag-research sa mga bag sa pribadong tunghaan pinaagi sa ilang guards, samtang magbutang og kapolisan sa gawas ug barangay tanod sa sulod alang sa mga pampublikong tunghaan.
Dugang pa ni Remulla, giduso usab niya ang mas hugot nga pagkontrol sa pusil ug ang pagrepaso sa Implementing Rules and Regulations (IRR) sa firearms law human sa mga aksidente sa pusil sa mga tunghaan sa Tacloban ug Zamboanga City nga gikalambigitan og mga menor de edad.
Giduso ni Remulla nga tugotan ang pag-inspeksyon sa mga balay diin gitipigan ang mga lisensyadong armas pinaagi sa waiver ug prior notice aron masiguro nga sakto ug luwas ang pagkatago niini ug dili kini isipon nga mga kriminal.
Bahin niini, gipadayag ni PNP Chief PGen. Jose Melencio Nartatez Jr. nga tun-an pa nila kini pag-ayo ug magpahigayon og konsultasyon aron masiguro nga dili malapas ang katungod sa privacy ug ang batakang katungod sa mga tag-iya og armas.
