Gipahayag sa Malacañang nga sakto ug balido ang mga pagsaway sa publiko bahin sa hospital detention sa gitanggong nga kanhi House Speaker nga si Martin Romualdez. Apan, gipahibalo sa Malacañang nga ang mga awtoridad kinahanglan gihapon nga morespeto sa assessment ug desisyon sa iyang mga doktor.
Si Romualdez, ig-agaw ni Presidente Ferdinand Marcos Jr., kasamtangang gibantayan sa kapulisan sulod sa Cardinal Santos Medical Center sa San Juan City human giisyuhan og warrant of arrest sa Sandiganbayan tungod sa kasong plunder nga may kalambigitan sa flood control projects controversy.
Nagpahayag usab og pagduhaduha ang mga netizen online tungod kay ang kanhi speaker gipasulod pipila ka oras sa wala pa gi-isyu ang warrant.
Sa usa ka press briefing, gipasabot ni Palace Press Officer Claire Castro nga ang Philippine National Police (PNP) ug ang Department of the Interior and Local Government (DILG) dili makapugos sa pagbalhin sa usa ka akusado kon ang iyang mga doktor miingon nga dili pa siya angayan nga makagawas sa ospital.
Dugang pa ni Castro, kinahanglan gyud nga saligan ang mga opisyal sa medisina tungod kay gilauman nga sila ang mobutyag sa tinuod nga kahimtang sa ilang mga pasyente.
Gipasiugda usab niya nga ang DILG misunod sa hustong protocol tungod kay si DILG Secretary Jonvic Remulla mismo ang personal nga nag-isyu sa warrant sa adlaw nga kini gi-isyu.
Subay niini, gipasalig sa Malacañang nga tungod kay si Romualdez naa pa sa ospital ug gibantayan sa pulisya, siguradong dili siya makalingkawas sa hustisya.
