Gipahimangnoan ni Akbayan Partylist Representative Percival Cendaña ang kaimportante sa personal nga pagtambong sa mga miyembro sa impeachment court o mga senator-judge sa mga pagdungog alang sa usa ka makatarunganon ug patas nga desisyon.
Atol sa pakighinabi sa Bombo Newsteam kang Cendaña, gipaambit niini nga ang pagka-presentar sa impeachment court atol sa hearings mao ang labing importante nga obligasyon sa usa ka huwes. Gipasabot niya nga dili pwedeng makaboto sa katapusan nga desisyon ang mga senador nga nagtago o wala mitambong sa mga hearing, tungod kay wala sila’y kasiguruhan ug kapabilidad nga maka-appreciate o makatimbang sa mga ebidensya ug testimonya nga gipresentar.
Dugang pa ni Cendaña, ang mga senador nga na-suspendi sa ilang katungdanan kinahanglan usab nga ma-suspendi isip mga huwes sa impeachment trial ug walay katungod nga mobotar.
Sa pikas bahin, gisaysay usab ni Representative Cendaña nga kasaligan nga magpadayon ang mga legal nga lakang batok kang Vice President Sara Duterte tungod sa kakuwestiyunon ug kakusog sa mga ebidensya nga gipagawas batok kaniya.
Gikanayon niya nga kon ebidensya lamang ang basihan, klaro nga adunay probable cause o igong rason aron magpadayon ang seryosong kaso batok sa Bise Presidente.
Sumala sa lehislador, gawas sa giatubang nga grave threats nga kaso nga nakit-an sa tibuok kalibutan tungod sa pagpanghulga sa kinabuhi sa Presidente, First Lady, ug House Speaker, aduna usab lig-on nga basehan sa isyu sa confidential funds.
Gipatin-aw ni Cendaña nga bisan ang mga sakop ug allies mismo sa Bise Presidente ang nagpamatuod nga si VP Sara Duterte gayud ang mastermind ug nag-unang nagpaluyo sa paggasto ug pagwaldas sa maong pondo.
