Nagpangandam na ang House Prosecution panel alang sa gikatakdang oral arguments mahitungod sa isyu sa “two-thirds vote threshold” sa nagpadayon nga impeachment trial ni Bise Presidente Sara Duterte.
Magpahigayon og oral arguments ang Senate Impeachment Court sa sunod semana ug nagdapit og mga retiradong justices sa Supreme Court aron mohatag og katin-awan sa hustong pagkuwenta sa two-thirds nga boto basi sa kinatibuk-ang gidaghanon sa mga senador—ilabi na mahitungod sa mga senador nga wala miapil sa mga proseso.
Matod ni Atty. Hez Montalan, Deputy Spokesperson sa House Prosecution panel, hugot nga gisusi sa ilang legal team ang tanang may kalabotan nga mga balaod ug jurisprudence aron ipresentar atubangan sa korte.
Gipahayag sa abogado nga pabor ang prosecution nga usbon ang basehan sa ihap—imbes nga gamiton ang kinatibuk-ang 24 ka senador, ihapon lamang kadtong aktibong miapil sa trial—bisan pa man nga tahuron nila ang kataposang desisyon sa impeachment court.
Samtang, gipasiugda sa House panel ang kamahinungdanon sa pagpatawag kang Davao City Mayor Baste Duterte, human giaprobahan sa impeachment court ang subpoena nga nagmando sa iyang pagtambong sa sunod semana.
Tumong sa panel nga pangutan-on ang mayor mahitungod sa mga rekord sa negosyo sa Bise Presidente nga anaa sa paghupot sa Office of the City Mayor; giklaro nila nga ang maong mando gipagawas base sa iyang opisyal nga katungdanan ug walay kalabotan sa kamatuoran nga managsuon sila.
