Giduso ni Senate Energy Committee Chairman Erwin Tulfo ang pagpasar sa Senate Bill No. 2486, o ang Systems Loss Charge Removal Act.
Tumong sa maong lakang nga wagtangon ang awtomatikong pagpasa ngadto sa mga konsumidor sa mga gasto nga resulta sa “system losses” o mga pagkawala sa kuryente nga nasinati sa mga distribution utility ug electric cooperative.
Gipasiugda ni Tulfo nga sa pagkakaron, ang mga konsumidor dili lang mobayad sa kuryente nga aktuwal nilang gigamit, apan lakip na sa kuryente nga nawala una pa kini makaabot sa ilang mga panimalay.
Ang “non-technical system losses” naglakip sa power pilferage, illegal connections, defective meters, poor maintenance, billing deficiencies ug inefficient operations.
Ubos sa maong sugyot, ang Energy Regulatory Commission (ERC) maoy magdeterminar kung unsang mga gasto ang angay, makatarunganon, ug gikinahanglan alang sa episyenteng operasyon sa sistema sa distribusyon, imbes nga tugotan ang awtomatikong pagpasa sa gitugotang system losses ngadto sa mga konsumidor.
Matod ni Tulfo, tumong sa maong lakang nga dasigon ang mga utility nga pugngan ang pagpangawat og kuryente, ayohon ang mga metro, ilisan ang mga karaan na nga ekipo, ug pauswagon ang serbisyo.
Apil sa sugyot ang usa ka transition period nga moabot sa tulo ka tuig aron hatagan og panahon ang ERC ug ang mga distribution utility sa pagpatuman sa mga kausaban.
Samtang, giila usab ni Tulfo ang bag-ong lakang sa Bureau of Internal Revenue (BIR) nga tangtangon ang Value-Added Tax (VAT) sa mga bayranan alang sa system loss.
Nagkanayon siya nga ang mga paningkamot aron mamenosan ang system losses angay nga moresulta sa mas maayong serbisyo ug pasilidad, imbes nga ipasa lang ang mga gasto ngadto sa mga konsumidor.
