CENTRAL VISAYAS- Giawhag sa usa ka Cebu Electricity Rights Advocate ang Energy Regulatory Commission (ERC) nga paspasan ang pagpalambo sa renewable energy ug ang pag-aprobar sa mga bag-ong power projects, isip tubag sa padayon nga pagsaka sa presyo sa kuryente nga gilauman nga moabot sa P17.00 kada kilowatt-hour (kWh) karong buwan sa Hulyo.
Kini ang gipasabot ni Nathaniel Chua, Convenor sa Cebu Electricity Rights Advocate, nga adunay duha ka nag-unang tinubdan sa suplay sa kuryente.
Ang una mao ang base load power supply, nga naggikan sa mga regular nga power plants nga naghatag og padayon nga suplay sa kuryente.
Samtang ang ikaduha mao ang peaking power supply, nga gigamit lamang sa higayon nga mosaka ang panginahanglan sa kuryente lapas sa kasagarang demand.
Matod niya, ang padayon nga pagsaka sa presyo sa lana, ilabina sa diesel, tungod sa nagpadayon nga tensiyon sa Middle East, maoy nakapahimo sa mas dako nga pagsalig sa peaking power supply.
Kini, ingon niya, maoy usa sa mga hinungdan sa pagsaka sa generation cost ug sa kinatibuk-ang bayrunon sa kuryente.
Gipasiugda usab ni Chua nga aron malikayan ang balik-balik nga pagsaka sa presyo sa kuryente ug ang sunod-sunod nga power interruptions, gikinahanglan nga magtukod og dugang nga mga power plants aron mapalig-on ang suplay sa enerhiya sa nasud.
Dugang pa niya, kinahanglan usab nga paspasan sa ERC ang pagproseso ug pag-aprobar sa mga permit ug lisensya alang sa mga power generation companies aron dali nga madugangan ang kapasidad sa suplay sa kuryente.
Samtang, naglaum si Chua nga ang bag-ong resolusyon sa ERC nga naglugway sa moratorium sa pagputol sa serbisyo sa kuryente sulod sa tulo ka bulan, gikan sa Agosto hangtod Oktubre, makatabang sa pagpagaan sa pinansyal nga kabug-at nga giatubang sa daghang konsumidor.
Giawhag usab niya ang kagamhanan nga mas palapdan ang pagpamuhunan ug paggamit sa renewable energy, sama sa solar power, aron masiguro ang lig-on, limpyo, ug mas barato nga suplay sa kuryente sa umaabot.
