Gipahayag ni Rep. Chel Diokno atol sa iyang oral argument nga wala kuwestiyona sa prosekusyon ang rekisito nga two-thirds, kondili ang denominator o ang basehan sa pagkalkula niini. Matod niya, ang pangutana mao ang: ‘Two-thirds sa pila ka tawo?’
Gikutlo niya ang mga amici curiae nga nag-ingon nga ang 16 ka boto dili usa ka permanente nga numero.
Subay sa prinsipyo sa tulubagon, gipunting niya nga angay lang maminaw ug magsusi sa ebidensya ang mga senador-maghuhukom sa dili pa mobotar.
Gipasidan-an usab niya nga problematahon ang pag-apil sa denominator niadtong mga senador nga wala makapanumpa, wala nakatambong, o dili makatuman sa ilang mga katungdanan.
Bisan pa niini, gipasiugda ni Diokno nga wala mausab ang rekisito sa Konstitusyon; gihangyo lamang nila ang impeachment court nga tukion kon kinsa ang angay iapil sa ihap aron matino ang maong threshold.
Samtang sa habig sa defense team ni Vice President Sara Duterte, ilahang gipdayon ang ilahang baruganan nga ang mga senator-judge nga wala makatambong angay gihapong iapil sa pagtino sa gikinahanglang gidaghanon sa mga boto.
Matod ni Atty. Michael Poa, naghupot ang korte og opisyal nga rekord nga mahimong basahon pag-usab sa mga wala nakatambong.
Gidugang niya nga kon bation nila nga kulang ang ilang basehan, aduna silay kapilian nga mo-abstain o dili moapil sa kataposang desisyon.
Gihatagan og gibug-aton ni Poa nga dili angay ipaubos ang kinahanglanang boto, ug kinahanglang sundon ang Konstitusyon nga nagmando og 16 ka boto aron mapamatud-ang sad-an ang respondent.
