Gikataho nga mosaka gihapon ang presyo sa cooking gas bisan pa kung modesisyon ang Malacañang nga suspinsuhon ang excise tax sa liquefied petroleum gas (LPG) ug kerosene, matod sa usa ka stakeholder.
Ang Department of Finance mirekomendar na sa temporaryong pagsuspinso sa excise tax, apan alang lamang kini sa LPG ug kerosene, ug dili sa diesel ug gasolina.
Mokabat ang excise tax sa LPG sa P3.00, apan inubanan sa VAT, mosaka kini ngadto sa P3.36 matag kilo. Alang sa kerosene, kini anaa sa P5.00, apan mahimong P5.60 kon apil ang VAT.
Matod ni Regasco President Arnel Ty, ang unang banabana nga pagsaka nga anaa sa P10 ngadto sa P25 matag kilo mikunhod ngadto sa P10-P15 matag kilo tungod sa pag-ubos sa presyo sa crude oil.
Sumala ni Ty, bisan kung tangtangon ang excise tax sa LPG, aduna gihapoy pagsaka sa presyo nga anaa sa P4 matag kilo, kon ang pagsaka magpabilin sa P10 matag kilo.
Sigon ni Ty, andam nga ipatuman ang pagsaka sa presyo sa hinay-hinay o “staggered” nga paagi kon hangyoon sila sa Department of Energy nga buhaton kini.
Sa pagkakaron, ang presyo sa LPG naglihok gikan sa P1,200 ngadto sa P1,400 matag 11kg nga tangke, apan tungod sa nagsingabot nga pagsaka nga P10 matag kilo, ang suggested retail price mosaka ngadto sa kapin sa P1,300 hangtod P1,500 matag regular nga tangke.
