Gipahinumdoman sa usa ka opisyal sa panglawas o inspeksyon sa karne ang publiko bahin sa saktong pagdumala ug pagtipig sa karne aron malikayan ang pagkadaot ug kadaot sa panglawas nunot sa gipaabot nga mas init nga panahon ug posibleng rotational brownouts tungod sa umaabot nga El Niño.
Kini ang gipaambit ni Dr. Sheila Cepedoza sa National Meat Inspection Service, diin gikanayon niya ang kamahinungdanon niini panahon sa El Niño diin mas taas ang temperatura ug mahimong mas paspas ang pagkadaot sa mga pagkaon kon dili husto ang preserbar niini.
Sumala niini, ang mga preskong karne nga gipalit sa merkado kinahanglang gamiton o lutoon sulod sa walo (8) ka oras kung walay refrigerator o freezer. Alang sa mga gi-freeze o gi-chill nga karne, kinahanglan kining ipabilin sa freezer o chiller. Gitambagan usab nga kung adunay taas nga brownout, ang pinakamaayong pamaagi aron masiguro nga dili madaot ang karne mao ang pagluto na niini dayon.
Lakip usab sa girekomendar ang paglikay sa kanunay nga pag-abli sa refrigerator ug freezer panahon sa brownout ug pagsiguro nga ang mga produkto sa karne dili ibutang sa temperatura nga mahimong paspas makapadaghan sa bacteria.
Busa, gipahinumduman ang mga konsumidor ug meat vendors nga dili lamang presyo ug kalidad ang tan-awon sa pagpalit og karne, kundili apil usab ang hustong pagtipig ug pagdumala niini.
Gikabalak-an usab ang posibleng epekto sa African Swine Fever sa suplay sa baboy sa Cebu, diin kung mosamot ang mga kaso ug mokunhod ang hog population tungod sa pagkamatay o culling, posible nga maapektuhan ang availability sa merkado ug mahimong mosaka ang presyo depende sa supply ug demand.
Busa, samtang giatubang ang hulga sa kainit, brownouts ug posibleng supply disruptions, gipasiugda ang responsableng pagtipig ug pagluto sa karne.
Ingon man nga gidasig ang publiko nga mopalit lamang gikan sa kasaligan ug inspected nga meat establishments ug likayan ang pagkonsumo sa karne nga kadudahan na ang kahimtang o dugay nang na-expose sa dili hustong temperatura.
