Hugot nga gikondena sa International Criminal Court (ICC) ang mga silot o sanctions nga gipahamtang sa Estados Unidos batok sa korte.
Matod ni ICC President Tomoko Akane, dili madawat ang maong mga silot tungod kay independente ang mga imbestigasyon sa korte ug gihimo kini subay sa balaod.
Gipasiugda ni Akane nga ang mga imbestigasyon sa ICC walay politikanhong motibo ug gibase lamang sa mga kamatuoran ug ebidensiya sa matag kaso.
Giisip usab niya ang maong lakang isip pag-atake sa hustisya alang sa mga biktima sa politikanhong pagpanglupig.
Bisan pa niini, mipasalig si Akane nga dili sila magpadaog sa mga hulga o mapahunong sa pagtuman sa ilang mandato tungod sa mga sanctions sa Estados Unidos.
Kahinumdoman nga nagpahamtang og mga silot ang administrasyon ni U.S. President Donald Trump batok sa ICC tungod sa mga imbestigasyon ug kaso nga gipadayon sa korte, lakip ang mga kalabot sa mga Amerikano, bisan dili miyembro ang Estados Unidos sa maong korte.
