Pasakaan og patong-patong nga kaso ang 18-anyos nga first-year college student nga giila nga suspek sa bomb threat batok sa Holy Name University (HNU), Bohol Island State University (BISU) ug University of Bohol (UB).
Lakip sa posibleng ikaso ang paglapas sa Presidential Decree No. 1727 o Anti-Bomb Joke Law, grave threats ug paglapas sa Cybercrime Prevention Act.
Nasuta sa mga awtoridad nga ang suspek nga nagpaluyo sa bag-ohay nga bomb threat sa tulo ka mga unibersidad sa Dakbayan sa Tagbilaran, mao ra usab ang naghimo sa laing pagpanghulga og bomba sa Tagbilaran City Science High School niadtong Agosto 18 ning tuiga.
Pinaagi sa lapad nga access ug tabang gikan sa Meta ug sa National Government, malampusong natumbok ang suspek kinsa nasayran nga dili lumad nga taga-Tagbilaran.
Migawas sa imbestigasyon nga ang modus sa suspek mao ang pag-impersonate o paghimo og mga peke nga Facebook accounts gamit ang pagkatawo sa mga tinuod nga tawo nga kauban ra usab sa iyang mga higala.
Gi-impersonate niini ang iyang mga kaila nga gitago sa pangalan nga Student A, B, ug C, ingon man nga nasayran nga sa miaging bomb threat niadtong Agosto 18, susamang suspek maoy naghimo sa pagpanghulga.
Una niini, nagpagawas og opisyal nga pahayag si Tagbilaran City Mayor Jane Yap kalabot sa mga hulga batok sa kinabuhi sa mga estudyante, magtutudlo, ug mga unibersidad, ingon man sa kinatibuk-ang kalinaw ug kahusay sa siyudad. Diin, gipasiugda sa mayor nga seryosong giatubang sa kagamhanang lokal sa siyudad kini nga butang ug dili kini pakamenoson.
Matod ni Mayor Yap, duna siyang gipatawag dayon nga mga hingtungdan nga awtoridad aron mapadali ang imbestigasyon. Tungod niini, daling milihok ug nasulbad sa Philippine National Police (PNP) ang insidente, diin naila ang suspek sulod lang sa 24 ka oras, ug gidayeg usab niya ang tibuok pwersa sa PNP, ubos sa pagpanguna ni Chief PNP Artates, tungod sa ilang paspas ug epektibong aksyon.
Namatikdan usab sa mayor nga aduna nay mga nangaging insidente sa pagpanghadlok o mga “hoax” sa pipila ka mga pampublikong tunghaan nga nakahatag og kabalaka sa mga kabatan-onan ug mga estudyante, busa gihimug-atan niya ang panginahanglan alang sa tulubagon ug bug-at nga silot alang sa bisan kinsa nga maghimo sa maong mga aksyon. via Bombo Fons Cabrillos
