Mokabat sa upat ka kilo nga shabu nga gibana-banang nagkantidad og P27.2 million ang nakompiskar sa tulo ka indibidwal atol sa buy-bust operation nga gihimo sa mga operatiba sa Philippine Drug Enforcement Agency Regional Office(PDEA) – 7 ug Cebu City Police Station 7 sa Saint Jude Phase 2, Barangay Bulacao.
Giila ni PDEA-7 Regional Director Joel Plaza sa subject sa operasyon nga si alyas Joseph, 33-anyos, food vendor ug nagpuyo sa Barangay Mohon, Talisay City.
Apil usab sa nadakpan ang duha ka mga kauban niini nga sila si alyas Eduardo ug pag-umangkon niini nga si alyas Harold, 25-anyos, ang duha pulos mekaniko ug taga Datagon, Pamplona, Negros Oriental.
Nasakmit atol sa operasyon ang lima ka vacuum-sealed packs sa shabu nga adunay timbang nga 4,000 grams ug gibana-banang nagkantidad og P27 million.
Ang maong operasyon subay na sa impormasyon nga nakuha sa mga operatiba sa ilahang confidential informant. Usa ka semana nila gipaubos sa case buildup ang suspect ug nasuta nga maka-dispose kini og 8 ka kilos sa shabu kada semana.
Sa pagkakaron, gisumiter na ang mga nasakmit nga ebidensiya sa PDEA-7 Regional Office Laboratory alang sa proper disposition. Samtang ang mga suspetsado temporaryong gikustosdiya sa PDEA-7 sa Barangay Lahug, u ang tulo ka mga suspetsado mag-atubang og kasong kalapasan sa Section 5 ug 11, Article II sa Republic Act 9165.
