Gitun-an karon sa Kagamhanang Probinsyal sa Sugbo ang pagpangita og solusyon dali ug dugay nga panahon aron sulbaron ang sitwasyon sa mga pamilya nga natulog sa gawas sa Vicente Sotto Memorial Medical Center (VSMMC).
Nahitabo kini human mikatag sa social media ang usa ka post nga nagpakita sa mga pamilya sa mga pasyente nga natulog sa karton sa gawas sa tambalanan.
Ang VSMMC adunay kasamtangang polisiya nga “one-patient-one-authorized watcher” (usa ka pasyente, usa ka awtorisadong bantay) ubos sa Hospital Order No. 2024-123, nga naglatid sa proseso sa pag-isyu og watcher’s pass.
Nagpagawas na og pahayag ang VSMMC nga nagklaro nga ang ilang polisiya nagtugot lamang og usa ka awtorisadong bantay matag pasyente aron masiguro ang kaluwasan, malikayan ang paghuot, ug mapadayon ang pagpugong sa impeksyon.
Matod sa administrasyon sa ospital, nakig-alayon sila kaniadto sa mga lokal nga kagamhanan aron makahatag og temporaryong kapuy-an ug transportasyon alang sa mga bantay sa pasyente, apan gihunong ang maong inisyatibo tungod kay gamay ra ang migamit niini.
Gipaambit usab ni Baricuatro nga nakig-alayon ang Kapitolyo sa ospital ug sa Department of Health (DOH) aron makahimo og gitagana nga lugar alang sa mga pamilya nga dili makasulod sa ospital, samtang gisiguro ang pagsunod sa mga polisiya sa ospital nga naglimita sa usa ka bantay matag pasyente.
Kini gumikan kay responsibilidad sa gobyerno ang pagtabang sa mga apektadong indibidwal, gipadayag sa gobernadora ang iyang kabalaka bahin sa mga pamilya nga natulog sa gawas sa ospital, ilabi na kay kadaghanan kanila mga Sugboanon.
