Gidepensahan sa National Food Authority (NFA) ang importasyon sa bugas gikan sa ubang mga nasod, nga nag-ingon nga makatabang kini sa paglikay sa kakulang sa suplay sa bugas sa nasod.
Gibutyag ni NFA Administrator Larry Lacson nga ang plano sa pag-import og bugas gisugyot sa mga grupo sa pribadong sektor nga nalambigit sa industriya sa bugas.
Giklaro niya nga dili direktang nalambigit ang gobyerno sa maong inisyatiba.
Dugang pa ni Lacson, wala pay mga aplikasyon alang sa import permit nga miagi sa ilang buhatan ug dili usab ang NFA mismo ang nag-import og bugas.
Kahinumdoman nga sa miaging semana, gipahibalo sa Philippine Rice Industry Stakeholders Movement (PRISM) nga mipirma kini og kasabotan uban sa USA Rice aron tugotan ang pag-import og bugas gikan sa Estados Unidos sugod sa tuig 2027.
