Nasunog ang usa ka barko nga nagdala sa bandila sa Comoros samtang anaa sa territorial nga katubigan sa Romania, human sa mga taho bahin sa laing pag-atake gamit ang drone sa rehiyon sa Black Sea.
Matod ni Romanian Defence Minister Radu Miruta, usa ka opisyal nga imbestigasyon ang gihimo aron masuta kung naigo ba sa drone ang tanker nga Yara J, human sa sunod-sunod nga pagsulod sa wala mailhing mga drone ngadto sa kahanginan sa nasod.
Nahitabo kini human natala ang mga pag-atake batok sa duha ka barko duol sa baybayon sa Bulgaria diin ang usa niini nalunod, nga maoy hinungdan nga gipatawag sa gobyerno sa Bulgaria ang embahador sa Russia.
Gipahayag ni Ukrainian President Volodymyr Zelenskyy nga ang sunod-sunod nga pag-atake sa mga barkong sibilyan sa neutral nga katubigan gihimo sa mga drone sa Russia.
Taliwala sa nagkagrabe nga hulga sa mga ruta sa pamatigayon ug enerhiya sa Black Sea, ang mga silingang nasod lakip ang Bulgaria, Romania, ug Turkey, nagsugod na sa mga konsultasyon nga gitumong sa pagpalig-on sa seguridad sa mga barko ug pagpanalipod sa teritoryo sa NATO ug sa European Union.
