Gipasidan-an ni Department of the Interior and Local Government (DILG) Secretary Jonvic Remulla ang grupong True Brown Style (TBS) kalabot sa giingong pagrekrut sa mga menor de edad aron maapil sa mga kriminal nga kalihokan.
Sa pakighinabi sa mga sakop sa media sa Cebu Provincial Capitol niadtong Huwebes, Oktubre 15, miingon si Remulla nga wala siyay tuyo nga patyon ang mga miyembro sa maong grupo, apan paningkamotan niyang masiguro nga mapriso ang mga responsable.
Matod ni Remulla, miabot na sa mga probinsya, lakip ang Cebu, ang mga operasyon sa DILG ug Philippine National Police (PNP) aron pakigbatokan ang presensya sa grupo ug ang giingong pagrekrut niini sa mga batan-on.
Gipahayag sa kalihim nga usa sa mga gikabalak-an sa mga otoridad ang giingong pagrekrut sa mga batan-on nga nag-edad og 16 anyos pa lamang ug ang ilang pagkalambigit sa kriminal nga mga kalihokan sa sayong edad.
Gipasabot niya nga ang sayong pagkaladlad sa krimen mahimong makaapekto sa panglantaw sa mga batan-on sa balaod ug maghimo nga daw normal na lamang kanila ang pagbuhat og ilegal nga mga buhat samtang nagkadako.
Gibutyag usab ni Remulla ang giingong pamaagi sa *initiation* sa mga bag-ong miyembro sa TBS, lakip ang pagkulata kanila sulod sa 30 segundos ug ang pagpangawat sa usa ka convenience store isip kabahin sa ilang pagsulod sa grupo.
Sa laing bahin, gimandoan ni Police Brigadier General Arnold Evangelista Abad, regional director sa Police Regional Office 7 (PRO-7), ang mga may kalabotang yunit sa kapulisan nga imbestigahan ug monitoron ang mga street gang, lakip ang TBS.
Sa pamahayag ni Police Lieutenant Colonel Rolan Aliser karung Biyernes sa buntag, Oktubre 16, giklaro niya nga hangtod sa pagkakaron, wala pay naitalang insidente sa dakbayan sa Sugbo nga nalambigit sa maong grupo.
