CEBU CITY- Giklaro sa Department of Veterinary Medicine and Fisheries (DVMF) nga walay direktang operasyon sa dynamite fishing sa kadagatan sa Dakbayan sa Sugbo. Apan, padayon ang mga lakang sa lokal nga panggamhanan aron mapugngan ang pagsulod ug pagbaligya sa mga isda nga nakuha pinaagi sa ilegal nga pamaagi.
Matod ni Maria Merlyn C. Murillo, Officer-in-Charge sa Fisheries Division sa DVMF, gipalig-on sa dakbayan ang ilang market denial operations pinaagi sa pakigtambayayong sa Bantay Dagat, Bureau of Fisheries and Aquatic Resources (BFAR), Maritime, ug Philippine Coast Guard.
Niadtong miaging bulan, nakasakmit ang mga otoridad og usa ka kahon sa mga isda nga giingong nakuha pinaagi sa dynamite fishing. Gikatakda nga ipasaka sa BFAR ang tukmang kaso kalabot sa maong insidente.
Sa pakighinabi sa DVMF, gipatin-aw ni Murillo nga naggamit ang mga otoridad og mga timailhan sa gawas ug sulod sa isda aron matino kon kini nakuha ba pinaagi sa dynamite fishing.
Lakip sa mga timailhan nga susihon mao ang pagkabuto o pagkagisi sa air bladder, pagkabali sa mga bukog, ug presensya sa mga namuong dugo sulod sa lawas sa isda. Susihon usab ang mga pisikal nga kinaiya sa mga matang sa isda nga sagad maapektuhan sa maong ilegal nga pamaagi.
Dugang pa sa DVMF, dakong hulga sa marine ecosystem ang dynamite fishing tungod kay dili lamang ang mga isda ang madaot, kondili apil usab ang mga coral reef nga nagsilbing puy-anan sa daghang organismo sa dagat.
Kon madaot ang mga coral reef, mawad-an og kapuy-an ug dapit nga pangitlugan ang daghang isda, nga mahimong mosangpot sa pagkunhod sa ilang populasyon.
Padayon nga gipalig-on sa DVMF ug sa mga kaubang ahensya ang pagbantay sa mga merkado ug suplay sa isda aron mapugngan ang ilegal nga pagpangisda, mapanalipdan ang kadagatan, ug masiguro ang kaluwasan sa mga konsumidor sa Sugbo.
