Gimando ni President Ferdinand Marcos Jr. pinaagi sa Executive Order No. 127 ang pagmugna og nasudnong polisiya alang sa carbon market aron makahimo og dugang panginabuhian samtang gipanalipdan ang kalikopan.
Pinaagi sa maong inisyatiba, ang mga mag-uuma, komunidad, ug negosyo mahimong makakwarta pinaagi sa pagtanom og kahoy, paggamit sa limpyo nga enerhiya, ug uban pang mga kalihokan nga makapakunhod sa greenhouse gas emissions.
Mahimo silang makadawat og carbon credits nga mahimong ibaligya sa mga kompanyang nagtuman sa ilang mga tumong alang sa kalikopan.
Matod ni Executive Secretary Ralph Recto, ang programa nagtumong sa pagpanalipod sa kinaiyahan ug pagmugna og trabaho, kita, ug panginabuhian, ilabina sa mga komunidad sa kabaryohan.
Ang Department of Environment and Natural Resources (DENR) maoy maghimo sa mga lagda ug magtukod sa Philippine National Carbon Registry aron masiguro ang tukmang pagmonitor sa mga carbon credit ug malikayan ang pagpanglimbong.
Gipasiugda usab ni Recto nga ang mando dili nagpahamtang og bag-ong buhis sa carbon, kondili nagtukod og reguladong merkado alang sa carbon credits.
Ang maong kita mahimo usab gamiton sa mga proyekto nga makatabang sa mga komunidad sa pag-atubang sa mga epekto sa pagbag-o sa klima.
Gihatagana ang DENR og 30 ka adlaw aron mosumite sa gisugyot nga polisiya, samtang ang komite adunay laing 30 ka adlaw aron aprobahan kini.
