Naangol ang pito ka Overseas Filipino Workers (OFWs) diin tulo kanila ang anaa pa gihapon sa kritikal nga kahimtang, sumala sa pinakabag-ong taho gikan sa Department of Migrant Workers (DMW) nga gipaabot sa Department of Foreign Affairs (DFA) niadtong Oktubre 19.
Sa usa ka gipagawas nga pahayag, gipahibalo sa DFA ug DMW nga nakig-alayon sila sa mga awtoridad sa Saudi Arabia aron paghatag og tabang sa mga Pilipino nga naapektuhan sa kagubot sa maong nasud.
Nahitabo kini human sa mga pag-atake sa King Khalid International Airport niadtong miaging Sabado.
Samtang, nagpadayag usab og pahasubo ang maong mga ahensya ngadto sa mga pamilya sa mga namatay sa maong kagubot, ingon man sa mga naangol sa maong trahedya.
“The Philippine Government extends its deepest condolences to the families of those killed in the attacks in several areas of the Kingdom of Saudi Arabia, and wishes a speedy recovery to those injured,” matod sa DFA.
Nanawagan usab ang mga ahensya ngadto sa tanang partido nga hunongon na ang paggamit og kapintasan ug hinuon mangita og malinawon nga resolusyon ug diplomasya aron masulbad ang panagbangi.
Ingon man nga giawhag ang mga Pilipino sa Saudi Arabia nga sundon ang mga giya nga gipagawas sa lokal nga mga awtoridad ug magpabilin nga nakig-alayon sa Embahada ug sa Consulate General.
