Nadiskubrehan sa mga astronomer sa pinaka-unang higayon ang usa ka green star sa kawanangan nga gitawag og WD J1330+6435, usa ka white dwarf nga makaplagan sa 280 light-years ang kalayo gikan sa kalibutan.
Sumala sa pagtoon nga gipangunahan sa astrophysicist nga si Mark Hollands gikan sa University of Warwick sa England, nakabaton og kulay chartreuse green ang bitoon human niini gikaon ang mga nahabiling debris sa mga nakapalibot nga planeta.
Dugang pagpasabot sa mga eksperto, ang taas nga densidad sa white dwarf nagresulta sa padayon nga pagbangga sa helium atoms sa sodium atoms, rasong nausab ang nakitang kahayag niini sa spectrum.
Imbes nga puti, na-absorb sa mga atom ang mga color yellow ug pula samtang gipagawas usab ang nahabiling Green nga kahayag nga talagsaong makita sa mga bituon.
Ang makasaysayanong pagdiskubre nga gimatala sa journal nga RAS Techniques and Instruments nagpamatood nga ang katibuk-an sa universe puno sa mga talagsaong katingalahan nga makumpara sa science fiction.
