North Korea, nagpagawas og litrato ni Kim Jong Un aron tubagon ang mga hungihong bahin sa iyang kamatayon

Nagpagawas ang North Korea og litrato sa ilang lider nga si Kim Jong Un aron tubagon ang mikaylap nga mga hungihong nga namatay na kini.

Sa gipagawas nga litrato, makita si Kim nga mibisita sa usa ka clothing ug footwear exhibition sa Pyongyang niadtong Oktubre 19.

Sumala sa Yonhap, gikataho sa Korean Central News Agency (KCNA) nga giubanan si Kim sa iyang asawa nga si Ri Sol Ju ug sa iyang anak nga babaye nga si Kim Ju Ae atol sa maong pagbisita.

Gipakita usab sa mga taho nga mibisita si Kim sa usa ka museyo niadtong Oktubre 11.

Sa wala pa ang pagpagawas sa maong mga litrato, mikaylap sa nagkalain-laing online platform ang mga hungihong nga namatay na ang lider sa North Korea.