Patay ang labing menos siyam ka tawo samtang laing 40 ang nasamdan human gipusil sa mga armadong suspek ang usa ka simbahan sa Karak sa habagatang bahin sa Jordan.
Sumala sa Public Security Directorate sa Jordan, wala pa madakpan ang mga wala mailhing suspek nga responsable sa pagpamusil nga giila nga teroristang pag-atake batok sa mga Kristohanon nga mitambong sa lubong sa lungsod sa Hmoud.
Gipahayag ni King Abdullah sa Jordan nga hugot nilang paningkamotan nga manubag sa balaod ang mga responsable sa maong teroristang pag-atake.
Matod sa hari, bililhon ang kinabuhi sa matag Jordanian ug lig-on ang ilang pag-atubang sa bisan kinsa nga molapas sa seguridad sa nasud.
Samtang, gipasalig ni Prime Minister Jafar Hassan nga nagtinabangay na ang tanang ahensya sa gobyerno aron madala sa hustisya ang mga responsable sa pagpamusil.
Gikondena usab ni Hassan ang maong insidente ug miingon nga resulta kini sa ekstremistang ideolohiya nga nagtamay sa mga tawo nga adunay lahi nga pagtuo.
