Gilugwayan sa Bureau of Internal Revenue (BIR) ang deadline alang sa pagpasaka sa quarterly Value-Added Tax (VAT) ug Percentage Tax returns, lakip na ang pagbayad sa mga katugbang nga buhis, hangtod sa Oktubre 29, 2026.
Subay sa Revenue Memorandum Circular No. 115-2026, ang maong lugway naglangkob sa BIR Form No. 2550Q (alang sa VAT) ug BIR Form No. 2551Q (alang sa Percentage Tax), nga orihinal untang angay ipasa sa Oktubre 26.
Ang lugway magamit usab sa pagsumite sa mga gikinahanglang dokumento o “attachments” gikan sa mga magbubuhis.
Gipasabot sa ahensya nga gihatag ang maong lugway tungod kay dili magamit ang Electronic Filing and Payment System (eFPS).
Gipirmahan ni BIR Commissioner Charlito Martin R. Mendoza ang maong circular niadtong Oktubre 26, ug kini nagsugod dayon sa pagpatuman.
Dugang pa nga giklaro sa ahensya nga ang mga magbubuhis nga mopasaka ug mobayad sulod niining gilugwayan nga panahon dili na pahamtangan og mga silot o “penalties.”
