Nanawagan ang Malacañang kang Senador Ronald “Bato” dela Rosa nga boluntaryong motahan sa mga awtoridad ug dili magsilbing bati nga ehemplo sa mga tawo nga naglikay sa balaod samtang aduna’y nag-ung-ong nga warrant of arrest.
Ang maong panawagan sa Palasyo gipagawas human opisyal nga gipahibalo sa Department of the Interior and Local Government (DILG) ang P50 milyon nga ganti o reward para sa makahatag og impormasyon sa iyang pagkasikop, samtang gihulagway siya ni DILG Secretary Jonvic Remulla nga “armado ug delikado.”
Gihatagan usab sa Philippine National Police (PNP) ang senador og usa ka semana nga lugway (ultimatum) aron murender, diin gipasabot sa Malacañang nga mas maayo nga boluntaryo siyang motahan aron malikayan ang bisan unsang tensyon o dugang aksyon gikan sa kapulisan.
Gipasiugda sa Palasyo nga isip usa ka kasamtangang senador ug kanhi hepe sa PNP, angay unta si Dela Rosa nga mahimong modelo sa pagtuman sa legal nga proseso ug balaod sa nasud.
Bisan pa man sa panawagan, gipasalig sa mga awtoridad nga padayon gihapon nilang pangitaon ug gukdon ang senador kon dili kini musurender.
Si Dela Rosa nag-atubang og warrant of arrest nga giluwatan sa International Criminal Court (ICC) may kalabotan sa giingong mga abuso sa war on drugs sa administrasyon ni kanhi Presidente Rodrigo Duterte—kinsa kasamtangan na usab nga gitanggong sa The Hague, Netherlands samtang nag-atubang og kiha alang sa crimes against humanity.
